Covid-19, kreu i OBSH për Evropën: Bllokadat mund të shmangen

Bllokadat e reja të vendosura në disa vende të Evropës mund të shmangeshin, bashkë me mbajtjen e maskës. Kështu deklaroi të enjten drejtori i Organizatës Botërore të Shëndetësisë për Evropën, Hans Kluge.

Në një deklaratë për mediat, Kluge nënvizoi se problemi qëndron tek sistemet shëndetësore në kontinentin e vjetër, të cilat sipas tij po mbingarkohen.

“Nëse të gjithë kujdesemi nga pak, bllokadat mund të shmangen. I qëndroj pozicionit tim se ato janë masa e fundit që duhet të merret. Gjithashtu, përdorimi i maskës nuk ofron mbrojtje absolute dhe duhet të shoqërohet e kombinuar me masa të tjera. Sidoqoftë, nëse përdorimi i saj shkon në 95% të popullsisë, bllokada nuk është e nevojshme”, deklaroi Kluge.

Zyrtari i lartë shtoi megjithatë se bllokadat duhet të hiqen gradualisht, pasi një heqje e tyre e shpejtë do të ishte e rrezikshme.

“Evropa është sërish epiqendër e pandemisë, bashkë me Shtetet e Bashkuara. Aktualisht ka një dritë në fund të tunelit, por do të kalojmë 6 muaj të vështirë”, theksoi Kluge.

Më tej, Kluge rekomandoi që shkollat të mbahen të hapura, pasi sipas tij, fëmijët dhe adoleshentët nuk janë kategori që përhapin coronavirusin. Madje, vetë mbyllja e shkollave nuk është një masë efikase.

Drejtori i OBSH-së për Evropën shtoi se organizata është në kontakt me prodhuesit rusë të vaksinës Sputnik për t’u informuar mbi testet klinike të saj.