COVID-19, rritje rekord e infektimeve në Evropë; zgjerohet harta e kufizimeve

Me një rritje rekord të numrit të infektimeve, qytetet franceze Lion, Sant Etien, Lile dhe Grenobël do të ndjekin shembullin e Parisit dhe do të jenë në gatishmëri, që do të thotë se mund të ketë kufizime për baret dhe restorantet.

Franca druhet se virusi qarkullon shumë shpejt dhe ministri i Shëndetësisë u ka bërë thirrje qytetarëve të tregohen të përgjegjshëm, duke respektuar distancimin social.

Ndërkohë, Gjermania ka raportuar rritjen më të madhe ditore të infeksioneve që prej prillit, me mbi 4 mijë raste dhe Berlinin që po kthehet në një vatër të re. Ministri i Shëndetësisë, Jens Spahn u bëri thirrje qytetarëve të mos e çojnë dëm luftimin më të suksesshëm në Evropë të sëmundjes.

“Nëse qytetarët bëjnë detyrën, shanset e virusit bien dramatikisht. Kjo pandemi është një test karakteri, për karakterin tonë si shoqëri”, deklaroi Spahn.

Në Spanjë, presidentja e rajonit të Madridit, Isabel Diaz Aiuso, që paralajmëroi njoftimin e masave të reja të drejta dhe të balancuara, u rekomandoi qytetarëve të mos largohen nga kryeqyteti në orët e ardhshme. Ndërsa kryeministri Pedro Sanchez deklaroi se nuk do ta heqë gjendjen e alarmit në Madrid, por do të negociojë me qeverinë lokale për masa më të përshtatshme.

“Jemi të shqetësuar për evolucionin e pandemisë në Madrid. Për pasojë ne duhet të vëmë të gjitha instrumentet në tryezë për të frenuar përhapjen dhe mbajtur virusin larg. Duam ta bëjmë këtë në bashkëpunim me komunitetin e Madridit”, deklaroi Sanchez.

Ndërkohë, vende të ndryshme nga Europa lindore po raportojnë rritje rekord. Rusia tejkaloi kuotën e 11 mijë infektimeve të enjten, një nivel i barabartë me pikun e verifikuar në maj,, por qeveria nuk ka në plan masa kufizuese.

Ndërsa Polonia e ka bërë përdorimin e maskës në publik të detyrueshme duke nisur nga e shtuna, pasi arriti 4.280 raste në një ditë.

Po ashtu Republika Çeke njoftoi mbylljen e komplekseve sportive dhe kulturore për dy javë duke filluar nga e hëna, për shkak të situatës shëndetësore.