COVID në Amerikën Latine, Krizë humanitare në Kili

Kilienët mbushën rrugët në kryeqytetin Santiago, duke kërkuar që qeveria t’u sigurojë ndihma familjeve në nevojë, përfshirë këtu ushqime dhe lëndë të tjera bazë.

“E vetmja mënyrë që kemi që të dëgjohemi është duke bërë protesta, duke ngritur barrikada në rrugë, duke bërë rrëmujë”, thotë një protestuese.

Trazirat vijnë teksa repartet e terapisë intensive në spitale thuhet se janë tej mbushur nga fluksi i pacientëve me COVID-19.

Në vend raportohet një mesatare prej 4 mijë rastesh infektimi në ditë, 15% prej të cilëve kërkojnë trajtim spitalor. Ekspertët po i bëjnë thirrje Kilit dhe vendeve fqinje që të ndërpresin reagimet shoqërore.

“Për shumë vende të kontinenteve amerikane, tani nuk është momenti për të lehtësuar masat kufizuese, apo strategjitë parandaluese. Është momenti që ato të qëndrojnë të forta, vigjilente dhe të implementojnë masat shëndetësore publike”, deklaron Carissa Etienne, drejtoreshë e Organizatës Shëndetësore Pan-Amerikane.

Ndërkohë, Brazili ka raportuar një tjetër ditë me një numër të lartë infektimesh nga COVID-19, shifër që në tërësi po arrin në 400 mijë të prekur dhe 24 mijë e 500 të vdekur.

Gjithashtu, edhe Peruja po raporton një kuotë të lartë, shenjë se kalimi i virusit mes njerëzve në vend po përshpejtohet.