Danimarka ndër shtetet e para të BE që heq të gjitha kufizimet e COVID-19

Pas 548 ditë kufizimesh për të kufizuar përhapjen e COVID-19, shkalla e lartë e vaksinimit të popullsisë i ka dhënë mundësinë shtetit skandinav që të bëhet kombi i parë në Bashkimin Europian që heq të gjitha masat kufizuese.

Mbi 80 për qind e popullsisë mbi moshën 12 vjeç është injektuar me të dyja dozat e nevojshme të vaksinës.

“Danimarka po heq kufizimet pasi fushata e vaksinës ka qenë shumë e suksesshme”, tha Jens Lundgren, pedagog i sëmundjeve virale në universitetin e Kopenhagenit.

“Si rrjedhojë, ne e kemi pandeminë nën kontroll, ndaj sistemi ynë i shëndetësisë mund t’i përballojë ato pak persona që ende mund të infektohen”.

Nga mesnata, qeveria daneze nuk e konsideron më COVID-19 si “sëmundje kritike shoqërore”.

Në fund të gushtit, ministri i Shëndetësisë Magnus Heunicke gjithashtu tha se pandemia është në kontroll, por paralajmëroi se qeverisë do i duhet të ndërhyjë në rast se situata përkeqësohet.

Që prej 14 gushtit, shteti skandinav hoqi dhe masën për mbajtjen e detyrueshme të maskës në mjetet e transportit publik.

Më 1 shtator u rihapen klubet e natës, u hoqën kufizimet për grumbullimin e personave dhe nuk nevojitej më të tregohej vërtetimi i vaksinës në restorante, stadiume, palestra dhe floktore.

Megjithatë, mbajtja e maskës mbetet e detyrueshme në aeroporte dhe qytetarëve u këshillohet ta mbajnë kur shkojnë tek doktori ose në ambiente spitalore.

Distanca fizike mbetet e rekomandueshme, ndërsa hyrja për të huajt në kufi është subjekt i kontrolleve strikte.

LEXONI GJITHASHTU:

• Danimarka, shteti i parë që ka kryer më shumë vaksinime në grupmoshën 12-15 vjeç
• ‘COVID-19 nën kontroll’, Danimarka heq përdorimin e certifikatave në ambientet publike