Delegacioni i talebanëve pritet me protesta në Norvegji

Një delegacion afgan u ul në Oslo për të marrë pjesë në bisedimet e para zyrtare të talebanëve me Perëndimin, në tokë europiane, që prej marrjes së pushtetit.

Bisedimet zhvillohen mbi tema si të drejtat e njeriut dhe ndihma humanitare, pasi kriza e varfërisë në Afganistan po thellohet.

Situata atje është përkeqësuar që kur talebanët erdhën në fuqi. Ndihmat ndërkombëtare u ndërprenë papritmas dhe Shtetet e Bashkuara kanë ngrirë 8,4 miliardë euro në asete të bankës qendrore afgane.

Uria tanimë kërcënon 23 milionë afganë, ose 55% të popullsisë, sipas Kombeve të Bashkuara, që thonë se ju duhen 5 miliardë dollarë nga vendet dhuruese, vetëm këtë vit, për të përballuar krizën humanitare në vend.

Disa protestues u mblodhën jashtë zyrave të Ministrisë së Punëve të Jashtme në Oslo për të refuzuar këto bisedime.

Shahia Soltani, protestuese dhe organizatore tha: “Ne jemi zëri i atyre afganëve që nuk e përdorin dot zërin e tyre.”