Demokratët shpallin fitoren, Pelosi: Humbëm betejën, fituam luftën

Demokratët në Shtetet e Bashkuara kanë shpallur, ndonëse në mënyrë të moderuar, fitoren në zgjedhjet presidenciale.

Pavarësisht se numërimet në shtetet kyçe nuk kanë përfunduar, kryetarja e Dhomës së Përfaqësuesve Nancy Pelosi ka deklaruar se Shtëpia e Bardhë tashmë i takon dyshes Biden-Harris.

Gjithashtu, Pelosi ka përshëndetur dominimin që demokratët kanë ruajtur në Dhomën e Përfaqësuesve, si dhe vendet e fituara në Senat, edhe pse nuk ishin ato që shpresonin.

“Presidenti i zgjedhur Joe Biden gëzon mandatin për të udhëhequr vendin. Në këtë mision ai ka mbështetjen e demokratëve në Dhomën e Përfaqësuesve dhe të atyre në Senat. Kjo ka qenë një betejë për jetë a vdekje, për fatin e demokracisë sonë. Ne nuk kemi fituar çdo betejë në Kongres, por kemi fituar luftën”, tha Pelosi.

Biden zgjeroi avantazhin e tij ndaj Donald Trump në shtetet e Pensilvanisë dhe Xhorxhias, duke u gjendur një hap larg Shtëpisë së Bardhë, kur kanë kaluar 3 ditë nga përfundimi i votimeve.

Aktualisht, ish-zëvendës presidenti ka 263 vota elektorale kundrejt 214 që ka presidenti në detyrë. Fitorja e mundshme në Pensilvani, shtet me 20 vota të tilla, do t’i jepte atij automatikisht postin e kreut të shtetit.