Dhjetëra të vdekur pas sulmit në një xhami në Afganistan

Të paktën 34 persona kanë humbur jetën dhe rreth 50 të tjerë janë plagosur pas një shpërthimi në xhaminë e qytetit të Kandaharit në Afganistan në kohën kur po mbahej falja e së premtes.

Shpërthimi kishte në shënjestër xhaminë Imam Bargah Ptima, e cila ndodhet në një zonë të qytetit të dominuar nga muslimanët shiitë.

Forcat speciale talebane siguruan zonën, teksa një javë më parë një sulmues vetëvrasës i IS-K sulmoi një xhami të mbushur me njerëz gjatë faljes të së premtes në qytetin Kunduz, në veri të Afganistanit. Rreth 50 persona u vranë dhe dhjetëra të tjerë u plagosën.

Sulmi u mor përsipër nga grupi ekstremist IS-K.

Shteti Islamik-Khorasan (IS-K), një grup militant rival i talebanëve, i shikon ndjekësit e sektit shiit të Islamit si heretikë dhe synon sulmin dhe shkatërrimin e vendeve ku ata kryejnë ceremonitë fetare.