Dhoma Amerikane e Tregtisë: Çmimet e referencave duhet të hiqen

Si çdo vit, problem kryesor i komunitetit të biznesit me zyrën e doganave mbetet i njëjtë: çmimi i referencës që punonjësit e doganave u vendosin mallrave, pa marrë parasysh faturën që u paraqitet nga tregtarët.

“Vazhdon të jetë problem çmimi i referencave. Kjo është një çështje që do përfundimisht zgjidhje. Janë metoda të vjetra dhe të prapambetura”, tha Presidenti i Dhomës Amerikane të Tregtisë, Enio Jaço.

Gjatë takimit me bizneset e Dhomës Amerikane të Tregtisë, kreu i Doganave Gent Gazheli, tha se gjatë këtij viti për 96% të rasteve të zhdoganimit nuk është përdorur referencë.

“Për 96% të rasteve është marrë parasysh vlera e transaksionit, çmimi i faturës së shitjes së mallit dhe është shumë afër nivelit të Bashkimit Europian prej 98%”, u shpreh Gazheli.

Pavarësisht kësaj përgjigjeje, Dhoma Amerikane tha se referencat janë problemi kryesor për të gjithë bizneset dhe propozoi një tjetër zgjidhje:

“Referencat janë shkelje e ligjit. Nuk duhet të vendosen, është metoda e gjashtë. Për sa kohë e kanë shqetësim pjesa më e madhe e bizneseve, ndodh në masë. Minimalisht të përditësojmë listën e çmimeve që vendosin për referencë sepse i mbani të larta”, theksoi kryetarja e Komitetit të Taksave në Dhomën Amerikane të Tregtisë, Alketa Uruçi,

LEXONI GJITHASHTU

• Ulet çmimi i naftës, 249 lekë për litër
• Bordi rrit me 10 lekë çmimin e sheqerit