Dialogu me Kosovën, ministri i Jashtëm rus: Pranojmë çdo zgjidhje që i përshtatet Serbisë

Rusia dhe Serbia janë dy shtete të cilat do të vijojnë të kenë raporte të mira qoftë në qëndrimet ndaj Kosovës, por edhe në çështjet e tregtisë.

Gjatë një konference të përbashkët për mediat në Beograd mes ministrit të Jashtëm rus, Sergei Lavrov dhe presidentit serb Aleksandër Vuçiç, diplomati i Kremlinit u shpreh se shteti i tij është i angazhuar në zgjidhjen e çështjes së Kosovës dhe se Rusia do të pranonte çdo zgjidhje “që do t’i përshtatej Serbisë dhe popullit serb”.

Ai shtoi se është koha që të zbatohet ‘Marrëveshja për formimin e Asociacionit të komunave me shumicë serbe’.

Kryediplomati rus hodhi poshtë akuzat se Moska po ndërhyn në punët e brendshme të shteteve të Ballkanit Perëndimor duke nënvizuar se Brukseli po ndjek “një politikë që nuk është konstruktive”.

Krenar për raportet e mira me Rusinë, kështu u shpreh presidenti Vuçiç në fjalimin e tij.

“Unë jam krenar që jam në gjendje të them se kemi marrëdhënie jashtëzakonisht të mira me Rusinë. Ndryshe nga ata që kanë turp ose kanë frikë ta thonë këtë, unë nuk po e fsheh këtë. E them me krenari, sepse është në interesin e Serbisë”, u shpreh ai.

Ndalur tek kriza e energjisë, presidenti serb tha se Serbia shpresonte të merrte çmimin më të mirë për gazin rus në Evropë.

Ai kritikoi vendet evropiane që nuk kanë nënshkruar marrëveshje afatgjata me Rusinë për furnizimin me gaz natyror.

LEXONI GJITHASHTU:

• Gjyqi ndaj veteranëve të UÇK në Hagë, Gucati dhe Haradinaj pretendojnë pafajësi
• Deputeti i Listës Serbe i dënuar me burg, arratiset në Beograd
• 5 persona në pranga për terrorizëm në Kosovë