Diaspora për Shqipërinë e Lirë, disa propozime për votën e tyre

Përfaqësuesit e grupimit ‘Diaspora për Shqipërinë e Lirë’ propozuan disa mënyra për sigurimin e përfaqësisë së diasporës në kuvendin shqiptar.

Në një intervistë për emisionin ‘Me pak fjalë’ në Euronews, Bledar Milaqi sqaroi: “Shqiptarët me banim jashtë Shqipërisë mund të votojnë për kandidatët që janë në vendin e regjistruar në regjistrin civil. [Mund] të votohet për një zonë të 13, ekstra territoriale ku emigrantët të përfaqësohen. Votim elektronik, me postë ose në qendra të hapura nga qeveria.”

Grupimi DSHL është pjesë e grupit të punës të ngritur nga KQZ për mundësimin e votës së tyre ne zgjedhjet e 2021, por përfaqësuesit e saj kanë kërkesat e tyre.

“Ne duam të bëhet mirë dhe jo ‘shkel e shko’. Kemi vënë re nga qeveria me emërime të personave politikë si komisioner të diasporës. Ne e kemi kundërshtuar. Duam të bëhet vota, por duam të bëhet saktë”.

Ata u shprehën se çdo emigrant, pavarësisht se jeton jashtë, ka familjen në Shqipëri dhe kërkon të ketë shërbime për familjarët e tij.

Bledar Milaqi deklaroi: “Pavarësisht se jemi jashtë, kemi lidhje të drejtpërdrejta, kemi familjet, miqtë aty. Lidhja asnjëherë nuk ka qenë e shkëputur.”

Ata shpjeguan se ndër vite, remitancat e emigrantëve kanë qenë faktor i rëndësishëm për ekonominë shqiptare, ndaj e drejta e tyre për votë është një e drejtë që lind natyrshëm për një sërë arsyesh.