Dieta e pashëndetshme në fëmijëri shkakton ndryshime afatgjata në tru

Një dietë e pasur me yndyrë dhe sheqer në fëmijëri mund të shkaktojë ndryshime afatgjata në mënyrën se si truri rregullon marrjen e ushqimit, edhe kur dieta e pashëndetshme ndërpritet dhe pesha e trupit kthehet në nivele normale.

Gjetjet e mësipërme u zbuluan nga shkencëtarët e institutit kërkimor “APC Microbiome” në University College Cork (UCC) në studimin e tyre.

Hulumtimi nxjerr në pah ndikimin afatgjatë të këtij ekspozimi të hershëm të fëmijëve ndaj ushqimeve të pashëndetshme, duke treguar se konsumi i shpeshtë i ushqimeve me dendësi të lartë energjie dhe vlerë të ulët ushqyese në fëmijëri mund të formësojë preferencat dhe të krijojë modele të pashëndetshme të të ngrënit që vazhdojnë në moshë madhore.

Në mënyrë specifike, studiuesit zbuluan se ekspozimi ndaj një diete me shumë yndyrë dhe sheqer gjatë viteve të para të jetës në një model paraklinik të miut çoi në ndryshime të vazhdueshme në sjelljen e të ngrënit në moshë madhore.

Këto ndryshime ishin të lidhura me ndërprerje të qëndrueshme në hipotalamusin e të rriturve, një rajon kyç i trurit i përfshirë në kontrollin e oreksit dhe ekuilibrin e energjisë.

Studimi, i botuar në revistën Nature Communications, tregon gjithashtu se ndërhyrjet që synojnë mikrobiomën e zorrëve, duke përfshirë një lloj specifik të baktereve të dobishme (Bifidobacterium longum APC1472) ose fibrat prebiotike (frukto-oligosakaride dhe lakto-oligosakaride), të cilat gjenden natyrshëm në ushqime të tilla si qepët, hudhrat, preshi dhe bananet. Ato mund të ndihmojnë në neutralizimin e këtyre efekteve që lidhen me dietën.