Drejtësi për George Floyd, ish-oficeri dënohet me 40 vite burg, vendimi mirëpritet edhe nga presidenti Biden

Fajtor! Ky është ky vendimi i gjykatës amerikane për ish-oficerin e policisë Derek Chauvin, i cili u shpall fajtor për tre akuzat e ngritura për vrasjen e afro-amerikanit George Floyd një vit më parë, ngjarje që shkaktoi zemërim dhe protesta jo vetëm në shtetet amerikane.

Chauvin kishte deklaruar se ishte i pafajshëm, por tanimë pas një seance të gjatë gjyqësore ai përballet me 40 vite burg.

“Ne juria, sikundër përmendëm më sipër akuzat për vrasje e paqëllimshme, vrasje e shkallës së dytë , e shpallim të pandehurin fajtor”, u shpreh  Peter Cahill.

Një moment i tillë ishte pritur për një kohë të gjatë nga familja e 46-vjeçarit, por edhe nga mijëra qytetarë që kishin dalë në rrugët e shteteve amerikane duke kërkuar drejtësi e më në fund duke festuar për vendimin e marrë.

Imazhet e ish- oficerit Chauvin  duke vendosur për nëntë minuta gjurin në qafën e Floyd  duke mos e lejuar të marrë frymë, shkaktoi protesta në të gjithë botën dhe thirrje për reformën ne polici.

Vendimi i marrë  në gjykatë shkaktoi ndjenja të përziera në qytetin e Minneapolis aty ku dhe ndodhi ngjarja.

Presidenti Joe Biden dhe zv presidentja Kamala Harris  e mirëpritën vendimin e gjykatës.

“Racizmi sistematik që është një njollë në shpirtin e kombit tonë. Askush nuk duhet të jetë mbi ligjin. Dhe vendimi i sotëm e dërgon këtë mesazh, por nuk mjafton. Ne nuk mund të ndalemi këtu. Në mënyrë që të kemi ndryshime dhe reforma të vërteta, ne mund dhe duhet të bëjmë më shumë për të reduktuar mundësitë që tragjedi si kjo të mos përsëriten. Është koha që vendi të bashkohet, të bashkohemi si Amerikanë. Kurrë nuk mund të ketë një strehë  të sigurt për urrejtjen në Amerikë”, u shpreh Biden.

Kjo është hera e parë që në shtetin e Minesotës një oficer i bardhë policie i përfshirë në vdekjen e dikujt, ndërsa ishte në detyrë u dënua për vrasje.

Lexoni gjithashtu:

Gjyqi për vrasjen e Floyd, trupa gjykuese pritet të japë vendimin për ish-oficerin e akuzuar Chauvin

Gjyqi për George Floyd, ish-polici i akuzuar për vrasje refuzon të dëshmojë në gjyq