Dy ditë para Uashingtonit, dialogu Kosovë-Serbi do të rinisë në Bruksel

Dialogu mes Kosovës dhe Serbisë përveçse në Uashington, do të mbahet edhe në Bruksel. Para se liderët kosovarë të udhëtojnë për në Shtetet e Bashkuara të Amerikës, stacionin e parë ku do të ndalen e kanë Brukselin.

“Po, mund t’ju konfirmoj që të enjten Kryeministri shkon në Bruksel”, ka thënë për Euronews Albania, Xhavit Beqiri, këshilltar për media në zyrën e kryeministrit.

Takimi i Brukselit pritet të mbahet më 25 qershor, dy ditë para takimit të Uashingtonit i planifikuar me 27 qershor.

Presidenti i Kosovës, Hashim Thaçi është shprehur se ky takim do të jetë i frytshëm për shtetin e Kosovës.

Ai ka shtuar para mediave se Kosova ka fituar gjithmonë kur Shtetet e Bashkuara të Amerikës kanë marrë në dorë një çështje, në të cilën Kosova ka patur interesat e veta politike dhe jo vetëm.

“Ky proces e ka mbështetjen e qartë të SHBA, të vetë presidentit Trump, por edhe vizonin e ambasadorit Grennel. Kosova ka besuar gjithmonë te SHBA dhe ka dalë fituese. Uashingtoni ka thënë qartë se ky proces është për njohjen reciproke në mes Kosovës dhe Serbisë, por në të njëjtën kohë për të vijuar anëtarësimin e Kosovës, në organizata ndërkombëtare, e në veçanti në OKB. Ky proces është për Kosovën dhe për të gjithë qytetarët e saj”, ka deklaruar pak kohë më parë, presidenti Thaçi.