E Premtja e Madhe, Papa Françesku drejton ritet, sheshi ‘Shën Pjetër’ thuajse bosh

Në të Premten e Madhe të Pashkës, Papa Françesku kryesoi ritin “Rruga e Kryqit në sheshin Shën Pjetër,  i cili ishte thuajse bosh.

Kreu i Vatikanit u lut që njerëzit të mos e humbasin rrugën e tyre mes problemeve të pandemisë, ndërsa në një rit të pazakontë mes pishtarëve ai dëgjoi tregimet prekëse të fëmijëve për pikëllimin dhe humbjen.

Për të dytin vit, për shkak të pandemisë, procesioni nuk mund të zhvillohej në vendin e tij tradicional, në Colosseum e Romës.

Shërbimi në arenën antike zakonisht tërheq mijëra pelegrinë, turistë dhe qytetarë italianë

Papa Françesku udhëhoqi gjithashtu ceremoninë “Pasioni i Zotit” në Bazilikën e Shën Pjetrit, duke shënuar vdekjen e Jezusit.

Edhe në Jeruzalem, qindra besimtarë ecën përgjatë Via Dolorosa për në Kishën e Varrit të Shenjtë për të shënuar të Premten e Madhe.

Kisha ishte e hapur vetëm për adhuruesit që mbanin maska dhe respektuan distancën nga njëri-tjetri.

Një vit më parë, Jeruzalemi ishte nën një shtetrrethim të rreptë.

Stacionet e Kryqit në Via Dolorosa dhe ritet e tjera u lejuan të kryheshin vetëm nga grupe të vogla priftërinjsh, ndërsa në vitet e mëparshme dhjetëra mijëra besimtarë kanë qenë  në Jeruzalem për të Premten e Madhe.

Këtë vit, Izraeli në sajë të ritmit të shpejtë të vaksinimit lejoi që së paku restorantet, hotelet kishat dhe sinagogat të jenë të hapura për besimtarët.