Ekonomia britanike në pikiatë, 20% kontraktimi në muajin prill

Ekonomia britanike u tkurr me 20.4 për qind në prill, kontraktimi më i madh mujor i regjistruar ndonjëherë, teksa Mbretëria e Bashkuar kaloi tërë muajin në bllokadë.

Zyra Kombëtare e Statistikave deklaroi se rënia “historike” ka prekur fusha të ndryshme aktivitetesh.

Kontraktimi është tre herë më i madh se rënia e regjistruar gjatë krizës ekonomike që ra në vitet 2008-2009.

Analistët thonë se prilli ka gjasa të jetë muaji më i keq, ndërkohë që në maj qeveria nisi lehtësimin e bllokadës.

Zyra Kombëtare e Statistikave publikoi gjithashtu shifra për tre muajt e mëparshëm, nga shkurti në prill, që treguan gjithashtu një rënie, ndonëse më të vogël në 10.4 për qind.

Ekspertët thonë se rrugët dhe zyrat e boshatisura, si dhe aktivitete të shumta të pezulluara çuan në një rënie kaq të thellë.

Të dhënat statistikore i shtohen presionit për të lehtësuar bllokadën më shpejt, por frika për daljen e sëmundjes nga kontrolli ka bërë që autoritetet të zgjedhin një proces gradual.

Në këto kushte ka edhe presion për Departamentin e Thesarit që të shqyrtojë hartimin e paketave ekonomike të shpëtimit, si ato të përgatitura në disa vende të Evropës.

Gjermania për shembull ka ofruar miliarda në një paketë për të ndihmuar familjet me fëmijë dhe blerësit e makinave me energji të pastër. Ndërsa Franca po i ofron fonde të mëdha shpëtimi industrisë së automjeteve dhe asaj ajrore.