Ekskluzive/ Samiti i BE-së me Ballkanin Perëndimor, nuk flitet për datë negociatash

Samiti i vendeve të BE dhe Ballkanit Perëndimor rrezikon të jetë një zhgënjim tjetër për sa i përket procesit të integrimit pasi vendet mund të mos marrin dritë jeshile për përparim në rrugën europiane.

Në draft deklaratën e samitit i cili mbahet në datën 6 tetor në BRDO, Vendet e Ballkanit Perëndimor nuk referohen më si vende kandidate për anëtarësimin por thjesht si partnere të Bashkimit Europian. Deklarata thekson se perspektiva europiane e rajonit është ende pjesë e axhendës por europianët nuk flasin më për afate dhe data për procesin e integrimit.

“BE konfirmon zotimin e saj për procesin e zgjerimit dhe vendimet e saj për të, të bazuara mbi reformat e besueshme të partnerëve, kushtëzimin e drejtë dhe rigoroz dhe parimin e meritës”, thuhet në dekëlaratë.

Pak ditë më parë agjencia e lajmeve Reuters shkruante se Bashkimi Europian nuk nuk mund ta garantojë me integrimin e vendeve të Ballkanit Perëndimor në Europë. Reuters paralajmëronte se në samit nuk do të caktohet asnjë datë për hapjen e negociatave me Shqipërinë dhe Maqedoninë e Veriut

Në deklaratë, vendeve të Ballkanit u kërkohet t’i dedikohen vlerave europiane si konsolindimi i demokracisë, lufta kundër krimit dhe korrupsionit, të drejtat e njeriut dhe media të pavarur. BE kërkon gjithashtu që partnerët, siç i quan vendet e rajonit t’i njohin kontributet e dhëna dhe t’i përmendin në publik

“BE deri tani është partneri më i afërt i rajonit, investitori më i madh dhe dhuruesi më i madh”, thuhet në deklaratë.

Megjithatë, deklarata mund të ndryshohet nëse vendet anëtare reflektojnë mbi vendimet e marra.

Sa i përket pandemisë COVID-19, në deklaratë thuhet se BE do të vazhdojë të mbështesë vendet e Ballkanit Perëndimor me vaksina dhe e njëjta mbështetje do të ndodhë me ekonominë.