Eksperti Spaho rendit masat që duhet të marrë qeveria për të zvogëluar varfërinë

Shqipëria është i vetmi vend në Ballkan, por dhe në Europë që ende nuk ka vlerësuar zyrtarisht një minimumin jetik të popullsisë.

Për këtë çështje, eksperti i ekonomisë, Mateo Spaho tha në një intervistë për Euronews Albania se qeveria shqiptare ende nuk ka një strategji për zvogëlimin e varfërisë dhe nuk i ka të përcaktuara objektivat.

Ai nënvizoi se nëse në qeveria do të përcaktonte minimumin jetik, kjo do i detyronte institucionet shtetërore të merrnin një sërë masash, që sipas tij janë: rritja e pagës minimale, kostot për shtresat në nevojë që lidhen me energjinë elektrike, me ujin e pijshëm, mbështetje për shpenzimet shëndetësore, pagesa për papunësinë, rritje e asistencave sociale dhe kurse për riaftësim të qytetarëve.

Z. Spaho deklaroi se taksat janë shumë të larta në raport me vendet e rajonit dhe këto ndikojnë më shumë tek shtresa e varfër.

Avokati i Popullit në bashkëpunim me zyrën e Programit të Kombeve të Bashkuara për Zhvillimin në Shqipëri, ka kryer një studim “për minimumin jetik në Shqipëri”, ku theksohet se minimumi jetik në vendin tonë për vitin 2019 është përafërsisht 17,875 lekë.

Kjo vlerë është 9,9 % më e lartë sesa pensioni minimal për zonat urbane, 37,5 % më e lartë se pagesa e papunësisë dhe rreth 3 herë më e lartë se ndihma ekonomike.

LEXONI GJITHASHTU:

• Shqipëria ende nuk e ka përcaktuar zyrtarisht minimumin jetik
• Studimi ekonomik, Adrian Civici: Mbi 90% e pensioneve janë më të ulëta se minimumi jetik