Ekstremi i djathtë fiton në Argjentinë, kush është populisti që u zgjodh president

Havier Milei fitoi zgjedhjet presidenciale në Argjentinë, duke mposhtur në balotazhin e së dielës ministrin e Ekonomisë, Serxho Masa, me 55 kundër 44 për qind të votave.

Politikani populist i ekstremit të djathtë fitoi në 21 nga 24 provincat e vendit. Rivali i tij pranoi humbjen përpara se autoritetet elektorale të njoftonin rezultatet paraprake.

“Dua t’ju konfirmoj se zotimi ynë ka të bëjë me demokracinë, me tregtinë e lirë dhe paqen. Ne do të punojmë përkrah të gjitha vendeve të botës për të ndihmuar në krijimin e një bote më të mirë”, deklaroi Javier Milei, president i zgjedhur i Argjentinës.

Ndër të parët që dërgoi mesazhin e urimit ishte presidenti brazilian Lula da Silva, i cili përmes një postimi në platformën X u shpreh se “Brazili do të jetë gjithmonë gati të bashkëpunojë me vëllezërit argjentinas”.

Milei ka premtuar një seri reformash radikale, përfshirë dollarizimin e ekonomisë argjentinase, shfuqizimin e Bankës Qendrore dhe shkrirjen e disa ministrive.

Aktualisht, Argjentina po përjeton nivelin më të lartë të inflacionit në dekada, që së fundmi ka kaluar kuotën 140 për qind.

Një admirues i ish-presidentit Donald Trump, ai është vetëpromovuar si një kryqëzor kundër socializmit global dhe me planet për të çmontuar qeverinë e një estabilishmenti të korruptuar.