Elon Musk bëhet personi më i pasur në botë, tejkalon 185 mld dollarë

Elon Musk është personi më i pasur në botë, teksa pasuria e tij ka tejkaluar shifrën e 185 miliardë dollarëve. Sipërmarrësi i Tesla dhe SpaceX ka kaluar para themeluesit të Amazon, Jeff Bezos, i cili mbante titullin e personit më të pasur në botë që prej vitit 2017.

Kompania e makinave elektrike Tesla ka njohur një rritje në vlerën e saj ndërsa për herë të parë këtë të mërkurë, arriti vlerën e 700 miliardë dollarëve në treg, duke u bërë kështu më e vlerësuar se gjigandë të prodhimit të makinave si Toyota, Volkswagen, Hyundai, General Motors dhe Ford të marra sëbashku. Dhe është pikërisht shtatë-fishimi i vlerës së aksioneve të Teslës ajo që katapultoi Musk në vendin e parë.

Sipas vetë Musk, gjysma e pasurisë së tij ka për qëllim të ndihmojë në zgjidhjen e problemeve në botë, dhe gjysma tjetër do t’i shërbejë themelimit të një qyteti të vetë-qëndrueshëm në Mars, për të siguruar vijimësinë e jetës, në rast se Toka goditet nga një meteor, nëse ndodh Lufta e Tretë Botërore ose nëse vetë njerëzit e shkatërrojnë atë.

Ndërkaq, kalimi në vend të dytë i Jeff Bezos, duket se vjen për shkak se 4% e aksioneve të tij i kanë kaluar ish-bashkëshortes pas divorcit. Megjithatë, edhe për Bezos, viti i kaluar ka qenë fitimprurës, pasi pandemia e coronavirusit bëri që më shumë persona të blinin dhe të kërkonin shërbime online.