Evakuohen mijëra persona pas shpërthimit të vullkanit në Karaibe

Rreth 16 mijë persona janë evakuuar nga shtëpitë e tyre pas shpërthimit të vullkani La Soufriere në St. Vincent, një ishull në Karaibe.

Shpërthimi i parë ndodhi të premten në mëngjes, një ditë pasi qeveria lëshoi urdhrin për evakuimin e domosdoshëm të qytetarëve pas paralajmërimeve nga shkencëtarët të cilët kishin vënë re aktivitete sizmike pasditen e së enjtes.

Ekspertët kanë paralajmëruar se mund të ketë shpërthime të tjera brenda harkut kohor të një jave.

“Shpërthimi i parë nuk është medoemos më i fuqishmi që mund të vijë nga vullkani”, tha Richard Robertson, gjeolog në Qendrën e Kërkimeve Sizmike në Universitetin West Indies’.

Kryeministri Ralph Gonsalves i ka bërë thirrje qytetarëve që të ruajnë qetësinë dhe të vazhdojnë të respektojnë masat e COVID-19, teksa dha lajmin e mirë se nuk kishte raportime për humbje jete apo të lënduar nga shpërthimi i vullkanit.

“Do të ketë ndikim të keq mbi bujqësinë dhe mund të kemi humbur shumë kafshë, do të duhet të restaurojmë shtëpi, por sa të kemi jetën dhe forcën, do të rindërtojmë shtëpi më  të mira dhe më të forta së bashku”, tha kryeministri.

Gonsalves tha se në varësi të dëmeve, mund të duhet deri në 4 muaj për rikthimin e jetës në normalitet.

Vendet fqinje si Antigua dhe Guyana kanë ardhur menjëherë në ndihmë duke ofruar çadra, maska respiratorë dhe hapjen e përkohshme  të kufijve për strehimin e banorëve të evakuuar.

Shpërthimi i fundit i vullkanit është regjistruar në 1979, ndërsa në 1902 i ka marrë jetën rreth 1.600 personave.

Në Karaibet lindore janë 19 vullkane aktivë, përfshi dy nënujor pranë ishullit Grenada. Vullkani me aktivitetin sizmik më të lartë është Soufriere Hills në Montserrat duke pasur shpërthime të vazhdueshme që nga 1995.

Lexoni gjithashtu 

• Pas 800 vitesh, ‘rizgjohet’ vullkani, të frikësuar nga tërmetet banorët në Islandë rigjejnë qetësinë pas shpërthimit
• Hiri i vullkanit Etna mbulon qytetin e vogël siçilian të Zafferana Etnea
• Indonezi, filmohet shpërthimi i vullkanit