Evropa lehtëson kufizimet, në Hungari e Serbi rihapen shkollat, në Sllovaki e Zvicër, restorantet

Vende të ndryshme evropiane kanë nisur lehtësimin e kufizimeve anti-Covid.

Kështu, në Hungari dhe Serbi janë rihapur shkollat në bazë të kushteve të caktuara, ndërsa në Sllovaki dhe Zvicër janë rihapur restorantet dhe dyqanet.

Pas disa javësh debat, pavarësisht kundërshtimeve të sindikatave, kopshtet dhe shkollat e arsimit fillor në Hungari janë rihapur.

Në njërën prej tyre, klasat u pastruan dhe dezinfektuan gjatë fundjavës.

Gjithashtu, fëmijëve u është matur temperatura tek hyrja dhe u është dhënë anti-bakterial të gjithëve.

“Për shkak të veçorive të moshës, edukimi digjital nuk është më i përshtatshmi për këta fëmijë. Prandaj, si nxënësit edhe mësuesit e kanë kuptuar se vendi i tyre është në shkollë, për të ndjekur mësimin”, u shpreh Judit Gal, drejtoreshë shkolle në Budapest.

Ndërkohë, Portugalia ditën e hënë zbuti masat kundër COVID, duke lejuar rihapjen e qendrave tregtare, gjimnazet dhe universitetet, si dhe duke lejuar takimet mes familjarëve, pasi kuota e infektimeve ra.

Ky është hapi i tretë nga 4 që ka procesi i lehtësimit të kufizimeve, që nisi në mes të marsit.

Edhe në Serbi, shkollat filluan të hënën semestrin e dytë, me disa fëmijë që ndoqën mësimin në klasë dhe të tjerë online nga shtëpia.

Mësimi do të jetë 30 minuta, në vend të kohës standarde prej 45 minutash, ndërsa viti shkollor do të jetë 5 ditë më i gjatë për shkak të pandemisë.

Në Sllovaki, banorët e Bratisllavës mbushën të hënën rrugët, pasi vendi lehtësoi pjesërisht kufizimet e coronavirusit, duke lejuar hapjen e dyqaneve dhe floktoreve.

Edhe në Zvicër, nga e hëna janë lejuar të rihapen ambientet e jashtme të restoranteve, kinematë dhe palestrat, që mundën të rifillojnë nga puna në bazë të kushteve të caktuara. Që në orët e mëngjesit, në Lucernë kishin filluar përgatitjet.

Lexoni gjithashtu:

Protesta kundër masave anti-COVID, nga Gjermania, në Itali e Bosnje, qytetarët mbushin sheshet