Facebook, fitime rekord pavarësisht rrjedhjes së dokumenteve

Facebook ka siguruar fitime më të larta se parashikimet në tremujorin e tretë të vitit, edhe pse vazhdon të përballet me akuza të formuluara nga rrjedhja e dokumenteve të brendshme.

Konkretisht rrjeti social fitoi 9 miliardë dollarë në korrik, gusht dhe shtator, më lartë se 7.8 miliardë të fituara të njëjtën periudhë të vitit të kaluar.

Megjithatë, kompania është prekur nga një përditësim i ri i privatësisë për sistemin operativ iOS 14 të “Apple”, që e bën më të vështirë për markat të çojnë reklamat e tyre tek përdoruesit.

Fitimet vijnë në një kohë kur Facebook po përballet me akuzat për sjellje jo etike nga një ish-punonjse e tij.

Frances Haugen, ish-menaxhere pranë rrjetit social, ka publikuar një dosje me dokumente të brendshme, që sugjerojnë se Facebook vendos fitimet përpara sigurisë së përdoruesve.

Gjithashtu, media të ndryshme kanë raportuar se dokumentet tregojnë se si stafi i kompanisë ka dështuar në frenimin e përmbajtjeve që promovojnë ekstremizmin dhe nxisin urrejtjen.

Ditën e hënë, shefi ekzekutiv i Facebook, Mark Zuckerberg u tha investitorëve në një video-konferencë se, publikimi i dokumenteve në fjalë është vetëm një përpjekje për të krijuar një imazh të rremë të kompanisë.

LEXONI GJITHASHTU: 

• Facebook do të ndryshojë emrin – çfarë qëndron prapa ri-konceptimit të kompanisë?
• “Facebook do shtojë trazirat”, ish-menaxherja: Rrjeti social promovon përçarjen dhe ekstremizmin
• Facebook Papers – çfarë është bërë publike deri tani?