Fati i Julian Assange, gjyqtarja britanike: Vendimi për ekstradimin në janar

Një gjyqtare britanike deklaroi të enjten se do të vendosë vitin e ardhshëm nëse themeluesi i Wikileaks, Julian Assange do të ekstradohet në Shtetet e Bashkuara.

Autoritetet amerikane e akuzojnë 49-vjeçarin me origjinë australiane për komplot me qëllim hakerimin e kompjuterëve qeveritarë dhe shkelje të ligjit të spiunazhit në lidhje me publikimin e kabllogrameve konfidenciale përmes faqes Wikileaks në periudhën 2010-2011.

Gjyqtarja Vanessa Baraitser deklaroi në gjykatën e distriktit Old Bailey të Londrës në përfundim të dëgjimit të dëshmitarëve se do ta japë verdiktin më 4 janar.

Avokatët e Assange argumentojnë se akuzat janë të motivuara politikisht, se shëndeti i tij mendor është në rrezik, se kushtet në burgjet amerikane shkelin ligjet britanike për të drejtat e njeriut dhe se ai dhe përfaqësuesit e tij ligjore ishin përgjuar gjatë qëndrimit në ambasadën ekuadoriane në Londër.

Ndërkohë, ekipi ligjor që përfaqëson Shtetet e Bashkuara ka kundërshtuar pretendimet në fjalë dhe ka deklaruar se ato janë argumente që duhet të trajtohen në gjyq dhe jo për të ndaluar ekstradimin.