Nxitja e mbështetësve të tij për të mësyrë Kongresin Amerikan një javë më parë duket se po i nxjerr telashe Presidentit Amerikan Donald Trump edhe përtej politikës.
Federata Amerikane e Golfit (US PGA) ka vendosur të prishë marrëveshjen e nënshkruar më parë me Trump për të organizuar kampionatin kombëtar të golfit 2022 në një nga pronat e zotëruara prej tij.
US PGA njoftoi se eventi i vitit 2022 nuk do të zhvillohet në Trump National në Bedminster, rreth 65 kilometra në veri të New Jersey, duke e konsideruar organizimi ne eventit sportiv atje si “të rrezikshëm për imazhin e federatës”.
Kompleksi sportiv prej 520 hektarësh në New Jersey është një nga 17 të tillët të zotëruar nga Trump, i cili njihet për pasionin e tij për golfin. Ky kompleks pritej që në muajin maj të priste eventin kombëtar të golfit në SHBA.
US PGA po shqyrton tashmë për impiante të tjera sportive ku mund ta zhvillojë eventin. Federata ka rreth 29 mijë anëtarë dhe marrëveshjen me Trump-in e kishte nënshkruar në vitin 2014.
Përfaqësues të Presidentit Trump u shprehën të zhgënjyer nga ky qëndrim. Ata thanë se bashkëpunimi i deritanishëm me federatën ka qenë “i shkëlqyer”.
Vendimi në fjalë vjen pak ditë pasi demokratët kanë nisur diskutimet për të larguar nga zyra Presidentin në detyrë Donald Trump kjo pas mësymjes së rezidencës federale të Capitol Hill ku humbën jetën katër persona.
