Festime dhe kujtime historike, Mali i Zi shënon 20 vjet pavarësi

Mali i Zi këtë javë shënon 20-vjetorin e pavarësisë me koncerte dhe aktivitete festive që po mbahen në kryeqytetin Podgoricë dhe në qytete të tjera të vendit.

Më 21 maj 2006, qytetarët malazezë votuan në një referendum historik për të ardhmen e shtetit, ku 55.5% zgjodhën pavarësinë pas një periudhe të gjatë tranzicioni politik që pasoi luftërat në rajon dhe bombardimet e NATO në vitin 1999, të lidhura me konfliktin në Kosovë.

Ndarja nga shteti i përbashkët me Serbinë u konsiderua e thellë dhe përçarëse, duke pasur parasysh lidhjet e ngushta historike, fetare dhe kulturore mes dy vendeve, si dhe faktin që një pjesë e madhe e popullsisë malazeze identifikohet si serbe.

Procesi i pavarësisë u udhëhoq nga ish-lideri i Malit të Zi, Milo Gjukanoviç, i cili e orientoi vendin drejt integrimit euroatlantik dhe anëtarësimit në NATO.

Presidenti aktual i Malit të Zi, Jakov Milatović, deklaroi se integrimi i plotë në Bashkimi Evropian mbetet hapi i radhës për vendin.

“Njëzet vjet më parë, qytetarët e Malit të Zi morën vendimmarrjen në duart e tyre dhe kjo ishte baza e zhvillimit tonë. Progresi i madh ndodhi kur vendi u bë pjesë e NATO-s në vitin 2017. Të qenit pjesë e NATO-s për një vend të vogël si Mali i Zi është shumë e rëndësishme sepse NATO është garanci për sigurinë dhe shtetësinë tonë”, tha Milatović.