Festime duke zbatuar rregullat anti-COVID në Turqi, Greqi dhe Rusi

Të krishterët ortodoksë në gjithë botën po festojnë ditën e Pashkës, për herë të dytë nën kushtet e pandemisë globale.

Kështu, patriarku ekumenik Bartolomeu i Parë, lider shpirtëror i Krishterëve Ortodoksë me bazë në Stamboll, kreu një seri celebrimesh gjatë fundjavës, me kapacitete të kufizuara për shkak se Turqia ndodhet në një izolim të rreptë.

Në Greqi, qeveria i mbajti kufizimet kundër pandemisë në fuqi, ndërsa përgatitet të nisë sezonin e ri turistik javën e ardhshme.

Shumë shërbesa fetare u mbajtën në ambiente të hapura, ndërsa të tjera të mbajtura brenda kishave kërkuan ruajtjen e distancimit social dhe mbajtjen e maskës.

Në Rusi, ditën e diel patriarku ortodoks Kirill shprehu shpresën e tij që coronavirusi të zhduket dhe që pandemia të marrë fund.

Shumë besimtarë në katedralen e Moskës, “Krishti, shpëtimtar” mbanin maskë për të reduktuar transmetimin e virusit, me përjashtim të presidentit Vladimir Putin.

Putin i shprehu mirënjohjen e tij Kishës për kontributin në zbutjen e problemeve sociale dhe për promovimin e traditave familjare.