Fillon puna për rikonstruktimin e Katedrales së Notre Damit

Ditën e sotme, disa punëtorë në Paris filluan të çmontojnë 200 tonë metal që mbanin së bashku Katedralen e Notre Damit, pas shkatërrimit të saj nga zjarri që e përfshiu vitin e kaluar.

Kjo punë delikate kërkon që punonjësit të mbahen në litarë, duke u ulur me kujdes në rrënojat e djegura të katedrales.

Dy skuadra, secila me 5 punëtorë, do të përdorin sharra për të prerë tubat e metaleve që janë shkrirë me njëra-tjetrën. Përpara zjarrit të 15 prillit, në Katedrale ishin instaluar skela për rinovimin e saj.

Megjithatë, puna për të çmontuar 40,000 shufrat e metalit u shty për shkak të masave parandaluese të coronavirusit, që u vendosën më 17 mars në Paris.

Miliona persona përreth botës, panë skenën e frikshme të djegies së çatisë së një ndër monumenteve historike më të njohura në botë, ndërsa flakët sollën shembjen e kullës së kambanës.

Për rikonstruktimin e saj janë mbledhur më shumë se një miliard euro dhe presidenti francez Emmanuel Macron, ka vendosur një datë finale për rihapjen e dyerve të monumentit, për Lojërat Olimpike të 2024 në Paris.

Aktualisht Katedralja është e mbyllur dhe pritet të hapet pas disa vitesh.