Forcat kurde shtojnë betejën kundër Shtetit Islamik në Siri

Dhjetëra ushtarë dhe civilë janë vrarë në Siri pas një sulmi të egër në një qendër paraburgimi të kontrolluar nga kurdët në qytetin Hassakeh.

Më shumë se 100 militantë të Shtetit Islamik duke përdorur mitralozë dhe eksplozivë, nisën sulmin në burgun Ghwayran të enjten, ku mbaheshin shumë xhihadistë.

Një numër i të burgosurve arritën të shpëtonin kur një bombë shpërtheu pak jashtë objektit.

Një zëdhënës i Forcave Vetëmbrojtëse të udhëhequra nga kurdët tha se shumica e burgut ishte nën kontrollin e tyre të shtunën, përveç një pjese të vogël që ende mbahet nga të burgosurit rebelë.

Ai shtoi se luftimet po vazhdonin gjithashtu në lagjen e afërt Zuhour, ku ishin izoluar luftëtarët e Shtetit Islamik.

Grupi i Shtetit Islamik u mposht në Irak në 2017-ën dhe në Siri në 2019-ën, megjithëse mbetet aktiv përmes qelizave të fjetura në shumë zona.

Militantët nga grupi ekstremist ende kryejnë operacione, shpesh duke synuar forcat e sigurisë, stacionet e energjisë dhe infrastrukturën tjetër.

Sulmet kanë qenë në rritje muajt e fundit si në Siri ashtu edhe në Irak.

LEXONI GJITHASHTU:

• Varfëri ekstreme, qytetarët në Afganistan detyrohen të shesin organet