Franca dhe Gjermania gati për rinisjen e dialogut Kosovë-Serbi në Paris

Franca dhe Gjermania presin që dialogu midis Kosovës dhe Serbisë të rinisë shpejt, ka shkruar në një postim në Twitter, Ambasada e Francës në Kosovë.

“Së bashku me kancelaren e Gjermanisë, Angela Merkel, presidenti i Francës, Emmanuel Macron, mbetet i gatshëm për të mirëpritur një takim në Paris”, ka shkruar ambasada franceze.

Edhe ambasadori i Gjermanisë në Kosovë, Christian Heldt, u shpreh në frymë të ngjashme, duke thënë se Franca dhe Gjermania inkurajojnë vazhdimin e dialogut.

“Ne i mbështesim fuqishëm përpjekjet e Bashkimit Evropian, me të dërguarin e posaçëm për dialogun Mirosllav Lajçak, për të arritur përparim të rëndësishëm, në afat të prekshëm kohor, për zgjidhje gjithëpërfshirëse. Qeveritë tona janë të gatshme të ndihmojnë takimin e propozuar në korrik”, shkroi ambasadori Heldt në Twitter.

Presidenti i Francës, Emmanuel Macron, ka thënë se dialogu midis Kosovës dhe Serbisë mund të rifillojë gjatë një samiti në Paris, që është paralajmëruar të mbahet në korrik.