Franca në pritje të gjyqit historik, gati salla me 550 persona për procesin mbi sulmet e 2015

Gjyqi historik për sulmet e nëntorit të vitit 2015 në Paris, që vranë mbi 100 persona dhe plagosën mbi 1 mijë të tjerë, pritet të nisë 8 shtatorin e ardhshëm.

Për këtë arsye, në një sallë të Gjykatës së Parisit janë vendosur ulëset dhe kamerat e sigurisë, pasi pritet të paraqiten për t’u përballur me akuzat 20 persona, të konsideruar bashkëpunëtorë të autorëve të sulmit.

“Gjithçka është gati. Në sallë mund të ulen deri në 550 persona. Për të janë shpenzuar 8 milionë euro dhe vetë procesi do të jetë i pari i këtij lloji për të gjithë aktorët e tij, avokatët, prokurorët dhe gazetarët. Për herë të parë po shohim një gjyq të këtyre përmasave, edhe nëse i krahasojmë me gjyqet e pasluftës. Nuk kemi parë kurrë një gjyq që të zgjasë kaq shumë si ky për sulmet e 13 nëntorit”, thotë Laurence Barbry, gazetare e “France 3”.

Në tërësi, 130 persona mbetën të vrarë më 13 nëntor të 6 viteve më parë, kur një grup personash të armatosur dhe atentatorë vetëvrasës sulmuan Stadiumin e Francës, sallën e koncerteve Bataclan dhe një seri baresh e kafenesh në rrugët e Parisit.

Përgjegjësia për sulmin u morr përsipër nga Shteti Islamik, që u kishte bërë thirrje anëtarëve të tij për të sulmuar Francën për shkak të përfshirjes së vendit në luftën kundër ISIS në Irak dhe Siri.

Natën e sulmeve, presidenti i atëhershëm Francois Hollande shpalli gjendjen e jashtëzakonshme në mbarë Francën, që zgjati 2 vjet.

LEXONI GJITHASHTU:

• Franca miraton ligjin për vaksinim të detyrueshëm të punonjësve shëndetësorë
• Franca gjobit Google, 500 milionë euro për mosrespektim të “të drejtave të fqinjësisë”