Franca përkujton sulmet ndaj revistës “Charlie Hebdo” me 17 të vrarë

Ceremoni të ndryshme u mbajtën të premten në Paris, për të shënuar 7-vjetorin e sulmeve me sfond islamik ndaj redaksisë së revistës satirike “Charlie Hebdo” dhe ndaj një supermarketi hebre, ngjarje që lanë pas 17 persona të vdekur.

Ministri i Brendshëm francez, Gerald Darmanin dhe kryetarja e Bashkisë së Parisit, Anne Hidalgo udhëhoqën homazhet në nder të viktimave pranë selisë së “Charlie Hebdo”, përpara se të vendosnin buqeta me lule jashtë supermarketit “Hyper Cacher”.

Më 7 janar 2015, zyrat e Charlie Hebdo u bastisën nga dy persona të armatosur, vëllezërit Said dhe Cherif Kouachi, të cilët qëlluan dhe vranë 12 persona, përpara se të ekzekutoheshin nga policia pas dy ditë ndjekje, në veri të kryeqytetit francez.

Sulmi në fjalë u pasua një ditë më vonë nga vrasja e një oficereje policie nga Amedy Coulibaly, një besnik i Shtetit Islamik dhe sulmi në dyqanin hebre në periferi të Parisit, ku ai ekzekutoi 4 pengje, përpara se të vritej nga forcat speciale.