Furnizimi me vaksinën COVID-19, Komisioni Evropian marrëveshje me ‘Curevav’, në bisedime edhe me ‘Moderna’

Shtetet evropiane janë duke përjetuar një valë të dytë të pandemisë, por shpresat shtohen se shumë shpejt çdo gjë do të përfundojë dhe kjo falë vaksinave të cilat çdo ditë raportohen se po rezultojnë më efektive.

Në kushte të tilla Komisioni Evropian do të autorizojë një marrëveshje me firmën gjermane bioteknike ‘CureVac’ për të siguruar deri në 405 milionë doza të vaksinës së saj të mundshme COVID-19.

“Unë jam e lumtur të njoftoj një marrëveshje të re. Të martën do të autorizoj një kontratë të re për të siguruar një tjetër vaksinë COVID-19 për evropianët”, – u shpreh Presidentja e Komisionit Evropian Ursula Von der leyen.

Marrëveshja me ‘CureVac’ ndjek marrëveshjet e furnizimit që Komisioni ka arritur  edhe me kompanitë ‘AstraZeneca’, ‘Johnson & Johnson’, ‘Sanofi’ dhe ‘Pfizer’ për furnizimin e vaksinave të tyre të mundshme.

Presidentja e Komisionit gjithashtu tha se ajo shpresonte të përfundonte një marrëveshje edhe me kompaninë ‘Moderna’, e cila një ditë më parë bëri me dije se vaksina e saj ishte 95% efektive.

Edhe Komisionerja evropiane e Shëndetësisë u shpreh se unioni është në bisedime me kompaninë ‘Moderna’ për të siguruar doza të vaksinës. Ajo shtoi se testet e deritanishme të bëra me dije nga kompania amerikane ishin inkurajuese.

Përtej optimizmit për vaksinat e reja OBSH shprehet se duhet ende të tregohet kujdes deri në momentin e rezultateve përfundimtare dhe të sigurta.

“Kjo nuk është koha për vetëkënaqësi. Ndërsa  vazhdojmë të marrim lajme inkurajuese në lidhje me vaksinat COVID-19 dhe jemi optimist, ne jemi jashtëzakonisht të shqetësuar nga rritja e rasteve që po shohim në disa vende. Veçanërisht në Evropë dhe Amerikë, punonjësit shëndetësorë dhe sistemet shëndetësore janë në pikun e tyre”, Tedros Adhanom Ghebreyesus, drejtor i OBSH-së.

Ekspertët  thanë se OBSH do të bashkëpunojë me të gjithë zhvilluesit dhe kompanitë e vaksinave COVID-19 për planin  (COVAX)”. Sipas tyre, vaksina e coronavirusit mund të arrijë një furnizim shumë të kufizuar deri në gjysmën e parë të vitit 2021.