Gazetari shqiptar në Turqi sqaron deklaratën e Erdogan: Nuk e ka mallkuar Izraelin

I ftuar në një lidhje live për “Balkan Talks”, gazetari shqiptar në Turqi, Sokol Brahaj sqaroi kekuptimin me deklaratën e presidentit të Turqisë, Recep Tayyip Erdogan, pas ceremonisë së Fiter Bajramit, duke thënë se shumë media e interpretuan atë gabimisht, duke raportuar se presidenti kishte mallkuar shtetin e Izraelit.

Gazetari sqaroi se Erdogan nuk ka sulmuar popullin izraelit, por ka kritikuar qeverinë e Benjamin Netanyahut dhe sistemin sionist, duke u fokusuar në përgjegjësinë për krimet në Gaza.

Brahaj theksoi se përkthimi dhe raportimi i deklaratës nga disa media ka qenë i pasaktë dhe shpesh i nxjerrë jashtë kontekstit. Sipas tij, Erdogan gjithmonë ka ruajtur një politikë që mbështet ekzistencën e shtetit të Izraelit.

“Erdogan nuk ka thënë “Zoti e shkatërroftë Izraelin”, siç e kam lexuar në media. Ai nuk ka thënë një gjë të tillë. Unë e njoh mirë turqishten dhe mund të konfirmoj se Erdogan nuk ka mallkuar Izraelin si shtet, por ka kritikuar sistemin sionist dhe Netanyahu-n. Mallkim ndaj Izraelit nuk ka bërë. Shumë media e përkthyen atë si ‘Zoti e shkatërroftë Izraelin’, por në realitet Erdogan nuk ka mallkuar shtetin e Izraelit apo popullin e tij. Ai ka kritikuar sistemin sionist dhe kryeministrin Benjamin Netanyahu, duke theksuar se duhet të përgjigjen para drejtësisë ndërkombëtare për krimet në Gaza. Kjo është krejt ndryshe nga ajo që u raportua në disa media shqiptare, dhe ky keqkuptim ka ardhur kryesisht nga përkthimi ose interpretimi me qëllim politik”, tha gazetari.

Sa i përket Iranit, Brahaj deklaroi se qëllimi nuk është të shkatërrojë Amerikën apo Izraelin, por të tregojë se mund ti mbijetojë sulmeve dhe të shkaktojë dëme të ndjeshme.