Gjakderdhje në Liban, 5 të vrarë gjatë protestës për shpërthimin në Bejrut

Akte dhune janë verifikuar të enjten në qendër të Bejrutit, në Liban, gjatë një proteste të qytetarëve, të nxitur nga lëvizja islamike Hezbollah.

Të paktën 5 persona mbetën të vrarë kur një seri të shtënash, nga armë të kalibrit të rëndë, shpërthyen në mes të turmës.

Dëshmitarë nga vendi i ngjarjes deklaruan se përveç se nga persona në rrugë, të shtëna erdhën edhe nga snajperë të vendosur në dritaret e pallateve përreth.

Qytetarët, të mbështetur nga fraksionet islamike, po protestonin kundër një gjyqtari që ka në dorë çështjen e një shpërthimi të ndodhur vitin e kaluar në vend, që vrau rreth 200 persona.

Sipas manifestuesve, zyrtari në fjalë ka favorizuar pozicionin e disa ish-ministrave që ishin në pushtet kur episodi ndodhi.

Në vendin e ngjarjes u dëgjuan edhe shpërthime të fuqishme në momentin kur mbërriti ushtria për të vënë situatën nën kontroll.

Por edhe forcat e armatosura patën probleme për të zbuluar se nga vinin të shtënat. Sipas autoriteteve vendase, dy nga viktimat ishin qëlluar në kokë dhe në gjoks, gjë që vërteton praninë e snajperëve.