Gjermani, zgjatet masa e distancimit social

Autoritetet në Gjermani zgjatën masat e distancimit social deri më 29 qershor, në kuadër të përpjekjeve për kufizimin e përhapjes së koronavirusit.

Zgjatja e masave u bë përmes një marrëveshjeje mes qeverisë federale dhe atyre rajonale.

Në bazë të saj, 16 landet federale të Gjermanisë mund të lejojnë deri në 10 persona për t’u mbledhur së bashku.

Sidoqoftë, qeveria rekomandon që njerëzit të mbajnë të kufizuar numrin e kontakteve shoqërore dhe ta mbajnë atë sa më konstant të jetë e mundur. Gjithashtu, ajo sugjeron që grumbullimet mes njerëzve të bëhen jashtë shtëpive, ku rreziku për infektim është më i ulët.

Masat aktuale ishin parashikuar të hiqeshin më 5 qershor. Ato u futën për herë të parë në fuqi më 22 mars, si reagim ndaj valës së frikshme të KOVID-19.