Gjermania do të diskutojë mundësinë e marrjes së vaksinave ruse “Sputnik V”

Ministri gjerman i Shëndetësisë, Jens Spahn njoftoi të enjten se qeveria federale do të angazhohet në diskutime me Rusinë rreth mundësisë për të porositur vaksina “Sputnik V’.

Vaksina ruse aktualisht është nën shqyrtim nga Agjencia Evropiane e Barnave (EMA).

“I shpjegova për llogari të Gjermanisë Këshillit të Ministrave të Shëndetësisë së BE-së, që ne do të diskutojmë në marrëdhënie dypalëshe me Rusinë, së pari për të kuptuar kur dhe çfarë sasish mund të dërgohen,” – tha ministri Spahn për radion lokale WDR.

Spahn tha se Komisioni Evropian ka njoftuar të mërkurën që nuk do të negociojë në bllok, në emër të 27 vendeve anëtare për marrjen e mundshme të vaksinave ruse.

Vaksina “Sputnik V” është shpërndarë tashmë në 59 shtete të botës, por nuk ka marrë ende dritën jeshile nga EMA. Sipas raporteve të publikuara nga autoritetet ruse ka efektshmëri prej 91.6%.

Deklarata e ministrit të shëndetësisë vjen pak pasi udhëheqësit lokal të Bavarisë deklaruan se kishin rënë dakord për të marrë 2.5 milionë vaksina “Sputnik V”.