Gjermania nuk jep më dëmshpërblime për karantinën e të pavaksinuarve

Të gjithë ata persona të pavaksinuar, por që do të futen në karantinë për shkak të COVID-19 nuk do të paguhen më.

Aktualihst personat që vihen në karantinë në Gjermani paguhen për të kompensuar humbjen e të ardhurave nga mos-ndjekja e punës. Por kjo praktikë do të ndryshojë.

Rregullat e reja hyjnë në fuqi në muajin nëntor dhe shihet si një mënyrë për t’i nxitur njerëzit që të vaksinohen.

Pavarësisht kritikave ministri gjerman i Shëndetësisë Jens Spahn e cilësoi vendimin të drejtë duke theksuar se personat e vaksinuar nuk kanë përse të paguajnë për ata që nuk duan të vaksinohen.

Vaksinimi nuk është i detyrueshëm në Gjermani, por autoritetet kanë marrë masa për të nxitur procesin e imunizimit duke kushtëzuar aktivitete, apo dhe shërbime.

Edhe testet, që u kërkohen qytetarëve për të hyrë në restorante, nga data 11 tetor nuk do të jenë më falas.