Gjykata anulon kufizimet në Madrid, drejtësia mbështet autoritetet rajonale

Një gjykatë në Madrid ka hedhur poshtë të enjten urdhrin qeveritar që vendoste kryeqytetin spanjoll dhe 9 qyteza rreth tij në një bllokadë të pjesshme.

Në bazë të urdhrit të Ministrisë së Shëndetësisë, autoritetet rajonale të Madridit ndaluan nga 2 tetori banorët që të largoheshin nga zonat përkatëse pa pasur një arsye të fortë.

Gjithashtu, ato imponuan një seri masash të tjera për të frenuar përhapjen e infektimeve në një nga vatrat kryesore të coronavirusit në Evropë.

Por shefja e qeverisë rajonale të Madridit, Isabel Diaz Ayuso e kishte kundërshtuar vendimin me argumentet se bllokada sado e pjesshme do të dëmtonte ekonominë dhe se qeveria kombëtare nuk kishte pushtet për të vendosur kufizime në rajon.

Në vendimin e saj, gjykata ka mbështetur qeverinë rajonale, duke deklaruar se ekzekutivi qendror nuk ka autoritetet për të vendosur një kufizim të tillë dhe për më tepër pa pasur një mandat ligjor.

Deri më 7 tetor, sipas të dhënave të OBSH-së, rajoni i Madridit llogariste mbi 740 raste me koronavirus për 100 mijë banorë, duke u bërë kështu zona e dytë më e prekur me COVID e Evropës pas Andorrës.