Gjykata izraelite ndalon ankandin e mjetit të tatuazheve

Një gjykatë në Izrael ndaloi të mërkurën nxjerrjen në ankand të një mjeti të përdorur për të bërë tatuazhet tek të burgosurit e kampit të përqendrimit të Aushvicit.

Vendimi erdhi pas një thirrjeje të të mbijetuarve të Holokaustit.

I siguruar nga një koleksionist privat, mjeti me 8 copëza me përmasat e një thoi, secila e pajisur me gjemba që formojnë numrat, aplikohej në mishin e të burgosurve pasi ishte ngjyer me bojë për t’u bërë numrat serialë.

Koleksionisti Meir Tzolman, në web site-n e tij e kishte cilësuar objektin si ndër artikujt më tronditës të Holokaustit, me një vlerë të projektuar nga 30 mijë në 40 mijë dollarë.

Sidoqoftë, oferta arriti vetëm në 3 mijë e 400 dollarë të mërkurën, kur Gjykata e Tel Avivit pranoi kërkesën e të mbijetuarve për të ndaluar ankandin, duke detyruar koleksionistin të njoftonte pezullimin.

Mbi 1.1 milion persona, shumica e të cilëve hebrenj, mbetën të vrarë në Aushvic, një prej kampeve të shumta të përqendrimit të kontrolluara nga nazistët gjermanë gjatë Luftës së Dytë Botërore.

Kampi në fjalë ishte i vetmi ku të burgosurve u bëhej tatuazh.

Izraeli nuk ka ligj që ndalon shitjet private të objekteve të Holokaustit dhe njoftimi i gjykatës nuk saktësonte bazat ligjore mbi të cilat është marrë vendimi.