Urdhri i udhëheqësve talebanë për të ndaluar gratë të ndjekin studimet universitare ka shkaktuar indinjatë ndërkombëtare.
Urdhri kufizon më tej aksesin e femrave tek arsimi, në një kohë kur ato janë të përjashtuara nga shumica e institucioneve arsimore.
Vendimi vjen kur kanë kaluar më pak se tre muaj që kur disa mijëra gra dhe vajza dhanë provimet për hyrjen në universitete, me shumë prej tyre që aspironin të aderonin në inxhinieri dhe mjekësi.
“Kemi të bëjmë me shkeljen e një tjetër premtimi nga talebanët. E kemi parë këtë që prej ardhjes së tyre në pushtet, me mbylljen e hapësirave për gratë, jo vetëm në arsim, por edhe në sektorët publikë dhe me përjashtimin e tyre nga debatet publike”, tha Stéphane Dujarric, zëdhënës i sekretarit të përgjithshëm të OKB-së.
“Talebanët vazhdimisht kanë dënuar gratë afgane, duke u mohuar atyre shanset për një të ardhme. Asnjë vend nuk mund të lulëzojë kur gjysma e popullsisë së tij pengohet arbitrarisht. Arsimi është një e drejtë e njohur ndërkombëtarisht dhe është jetik për rimëkëmbjen ekonomike dhe stabilitetin e Afganistanit”, u shpreh Ned Price, zëdhënës i Departamentit të Shtetit.
Gratë afgane janë dëbuar nga shumë poste qeveritare, ose u paguhen rroga tepër të ulëta, me qëllim që të rrinë në shtëpi. Muajin e kaluar atyre iu ndalua të shkonin në parqe, panaire dhe palestra.
Udhëheqësit talebanë dhe klerikët afganë kundërshtojnë arsimin modern, sidomos për vajzat dhe gratë.
Sidoqoftë, komuniteti ndërkombëtar e ka caktuar të drejtën e arsimimit për të gjitha gratë një kusht të panegociueshëm për njohjen e regjimit taleban
LEXONI GJITHASHTU:
