Greqia zgjat izolimin, subjektet private mbeten të mbyllura

Autoritetet në Greqi vendosën të premten zgjatjen e izolimit deri më 18 janar, në përpjekje për të parandaluar përhapjen e pandemisë.

Vendi ndodhet në bllokadë që nga fillimi i nëntorit për shkak të rritjes së infektimeve, kryesisht në pjesën veriore dhe ka regjistruar një mbingarkim të sistemit shëndetësor teksa infeksionet po bien me ritme të ngadalta.

Dyqanet dhe subjektet që ofrojnë shërbime do të qëndrojnë të mbyllura. Përjashtim bëhet për shkollat fillore, të cilat do të hapen ditën e hënë; ndërkohë që ato të mesme do të qëndrojnë mbyllur.

Zyrtarët vendas deklaruan se rastet e infektimit në vend janë stabilizuar, por pati një rritje gjatë periudhës së pushimeve. Ekspertët janë të shqetësuar për një rritje të rasteve në radhët e moshave nga 25 në 35 vjeç.

“Ne duhet që me çdo kusht të stabilizojmë rritjen e verifikuar gjatë pushimeve. Është e qartë se nëse lejojmë një intensifikim të epidemisë, tani kur përhapja e saj është ende e lartë në radhët e shoqërisë, sistemi shëndetësor do të përballet me një presion të ri”, deklaroi Vana Papaevangelou, specialiste e sëmundjeve infektive.

Procesi i vaksinimit në vend filloi më 27 dhjetor, me punonjësit e kujdesit shëndetësor dhe të moshuarit. Ndërkohë, vaksinimi i publikut në përgjithësi do të nisë në fund të janarit.