Guvernatori i BSH-së: Rritja ekonomike për vitin 2021 parashikohet mbi 5%

Guvernatori i Bankës së Shqipërisë, Gent Sejko, pohoi se ritmi i rimëkëmbjes është përshpejtuar dhe ekonomia shqiptare ka hyrë në një trend përmirësimi përgjatë tre mujorit të këtij viti.

“Ritmi i rimëkëmbjes së aktivitetit ekonomik u përshpejtua dhe perspektiva e zhvillimit ka ardhur drejt përmirësimit gjatë tre muajve të fundit”, tha ai.

Ai pohoi se rimëkëmbja nuk është e plotë pasi pandemia e COVID-19 ka ndikuar ndjeshëm në rritjen e papunësisë.

“Këshilli Mbikëqyrës vëren se rimëkëmbja ekonomike nuk është e plotë dhe faktorët e saj mbështetës nuk janë ende të konsoliduar. Pasojat e pandemisë në ekonomi mbeten të dukshme në rënien e punësimit dhe në rritjen e papunësisë”,  shtoi z. Sejko.

Mes tjerash, z. Sejko tha se përgjatë vitit 2021 ekonomia shqiptare parashikohet të ketë një rritje mbi  5%.

“Banka e Shqipërisë parashikon një vit më optimist, seç kishim parashikuar në analizat e mëparshme. Rritja ekonomike do jetë mbi nivelin 5%. Ne presim një sezon turistik të mirë. Kjo pritshmëri është e bazuar në faktin se niveli i numrave të infeksionit po vijnë në rënie. Shifrat tregojnë për një rritje ekonomike përgjatë vitit 2021”, shtoi ai.

Guvernatori Sejko u shpreh se Këshilli Mbikëqyrës i BSH-së ka vlerësuar se qëndrimi aktual i politikës monetare është i përshtatshëm, ndërsa shtoi se norma bazë e interesit do mbetet e pandryshuar, në nivelin 0.5%.