Guvernatori Sejko: Projeksionet konfirmojnë rritje të ekonomisë në periudhë afatmesme

Guvernatori i Bankës së Shqipërisë, Gent Sejko tha se aktivitetet ekonomike në vend kanë patur një rikuperim të shpejtë.

“Informacioni i ri i marrë në analizë tregon një rikuperim të shpejtë të aktiviteteve ekonomike në vend”, tha ai.

Në konferencë për media, z. Sejko theksoi se projeksionet konfirmojnë për një rritje të mëtejshme të ekonomisë shqiptare në periudhë afatmesme. Ai tha se kthimi i inflacionit në objektiv pritet të bëhet vitin e ardhshëm.

“Përditësimi i parashikimeve tona, konfirmon projeksionet për një rritje të mëtejshme të ekonomisë shqiptare në periudhë afatmesme, çka do të krijojë premisa për kthimin e qëndrueshëm të inflacionit në objektiv brenda vitit 2022”, tha ai.

Por, pavarësisht këtij projeksioni, guvernatori theksoi se konkretizimi i tyre është i kushtëzuar nga ecuri e pandemisë COVID-19, rimëkëmbja e ekonomisë në nivel botëror dhe nga ndikimi i ofertës.

“Megjithatë materializimi i këtyre projeksioneve mbettë e kushtëzuar nga ecura e pandemisë, nga qëndrueshmëria e rimëkëmbjes së ekonomisë botërore si dhe nga ndikimi i goditjeve aktuale të ofertës”, tha ai.

Ai theksoi se rrija e çmimeve në tregjet ndërkombëtare do të ketë ndikim në normat e inflacionit.

Z. Sejko u ndal edhe tek punësim, ku shtoi se pavarësisht rritjeve në tremujorin e dytë të 2021, shkalla e papunësisë vazhdon të jetë më e lartë në krahasim me periudhën para pandemisë.

“Rritja e çmimeve në tregjet ndërkombëtare do ketë ndikim të inflacionit në vend dhe në botë. Punësimi i rrit me 1.1% në tre mujorin e dytë, ndërsa shkalla e papunësisë zbriti në nivelin e 11.6%. Pavarësisht tendencave përmirësuese, punësimi vijon të jetë më i ulët dhe shkalla e papunësisë më e lartë se nivelet e para pandemisë”, tha Sejko.