Ushtari më i dekoruar i Australisë arrestohet pas dyshimeve për krime lufte

Ushtari më i dekoruar i gjallë i Australisë u arrestua të martën dhe akuzohet për krime lufte që lidhen me vrasjen e civilëve të paarmatosur gjatë misionit në Afganistan.

Policia e identifikoi si një ish-anëtar 47-vjeçar të Forcave Mbrojtëse Australiane dhe ai u arrestua në aeroportin e Sidneit të martën në mëngjes.

Ai do të akuzohet për pesë akuza për krime lufte në lidhje me vrasjen e pesë personave në Afganistan midis viteve 2009 dhe 2012, tha Policia Federale Australiane (AFP). Dënimi maksimal për secilën akuzë është burgim i përjetshëm.

Roberts-Smith u cilësua si hero kombëtar pasi iu dha disa nderime të larta ushtarake, përfshirë Kryqin e Viktorias, për veprimet e tij gjatë gjashtë misioneve në Afganistan nga viti 2006 deri në vitin 2012.

Roberts-Smith ka mohuar vazhdimisht akuzat për shkelje gjatë shërbimit të tij, disa prej të cilave u raportuan për herë të parë nga gazetat Nine Entertainment në një seri artikujsh që filluan në vitin 2018.

Ndër akuzat e raportuara ishte se Roberts-Smith kishte qëlluar për vdekje një adoleshent afgan të paarmatosur dhe kishte shqelmuar një burrë të prangosur nga një shkëmb përpara se të urdhëronte që ai të qëllohej për vdekje.