Hegseth kërkoi shkarkimin e tij, shefi i Ushtrisë Amerikane jep dorëheqjen

Randy George, oficeri më i lartë i ushtrisë amerikane ka dhënë dorëheqjen nga roli i tij pasi sekretari i mbrojtjes, Pete Hegseth kërkoi që ai të dilte në pension menjëherë.

Pentagoni konfirmoi të enjten se George, i cili kishte shërbyer si shefi i 41-të i shtabit të ushtrisë, po dilte në pension.

“Gjenerali Randy A George do të dalë në pension nga pozicioni i tij si Shefi i 41-të i Shtabit të Ushtrisë menjëherë. Departamenti i Luftës është mirënjohës për dekadat e shërbimit të Gjeneralit George ndaj kombit tonë. I urojmë atij fat të mbarë në pension”, tha zëdhënësi i Pentagonit, Sean Parnell, në një deklaratë të ndarë në mediat sociale.

Pozicioni i shefit të shtabit të ushtrisë mbahet përgjithësisht për katër vjet. George ishte nominuar nga Joe Biden dhe konfirmuar nga Senati në vitin 2023, gjë që normalisht do ta kishte mbajtur atë në këtë rol deri në vitin 2027.

Përpara se të bëhej shef i shtabit, George punoi si asistent i lartë ushtarak i sekretarit të atëhershëm të mbrojtjes Lloyd Austin nga viti 2021 deri në vitin 2022 gjatë administratës Biden. Gjatë një karriere të gjatë ushtarake, i diplomuari i West Point shërbeu në disa konflikte, përfshirë në Irak dhe Afganistan.

Të enjten, Akademia Ushtarake e SHBA-së ndau foto të vizitës së fundit të George-it, duke shkruar se ai“ndau udhëzime të bazuara në përvojë me kadetët që përgatiteshin të udhëheqnin gjatë një paraqitjeje.

Që kur mori drejtimin në Pentagon, Hegseth ka shkarkuar disa oficerë të rangut të lartë. Ndër të shkarkuarit përfshihen zëvendësshefi i shtabit të forcave ajrore James Slife dhe shefja e operacioneve detare Lisa Franchetti.