Holanda bllokon Shqipërinë, Rama komunikim online me Varhelyi dhe Borrell

Holanda ende nuk është gati për të dhënë dritën jeshile për zhvillimin e Konferencës së Parë Ndërqeveritare të Shqipërisë me Bashkimin Europian.

Të martën, gjatë diskutimit në parlamentin holandez, ministri i Jashtem Stef Blok ka deklaruar se Shqipëria nuk i përmbush parakushtet për Konferencën e Parë Ndërqeveritare.

Përmes Twitterit, deputeti Pieter Omzigt u shpreh se qëndrimi i Holandës është diktuar nga ndryshimet në Kodin Zgjedhor dhe vakancat në Gjykatën e Lartë.

“Sapo patëm një debat në parlamentin holandez. Qeveria holandeze, ministri Blok, deklaroi qartë se Shqipëria nuk i përmbush parakushtet për Konferencën e Parë Ndërqeveritare. Kjo do të thotë se ai nuk do të japë pëlqimin. Problemet e diskutuara përfshijnë vendet vakante në Gjykatën e Lartë, ndjekjen penale të krimit në nivelet e larta dhe reformën zgjedhore, veçanërisht pjesën e dytë të njëanshme të asaj ‘reforme’”, u shpreh Pieter Omtzigt, reporter për Shqipërinë.

Në një kohë kur Holanda është kundër uljes së Shqipërisë në tryezen me Bashkimin Europian, kryeministri Edi Rama ka zhvilluar bisedime virtuale me Komisionerin për Zgjerimin, Oliver Varhelyi dhe Përfaqësuesin e Bashkimit Europian, për Politikën e jashtme, Josep Borrell.

Nëpërmjet rrjeteve sociale, të dy zyrtarët europian mbështesin angazhimin e Shqipërisë për të ecur përpara në rrugën e integrimit në Bashkimin Europian.

Lexoni gjithashtu:

Holanda strikte por konstruktive, nxit Shqipërinë të plotësojë kushtet para Konferencës së Parë Ndërqeveritare