Hungaria në zgjedhje, garë e ashpër mes kryeministrit Orban dhe opozitës

Qytetarët në Hungari nisën të hedhin votat në kuti mëngjesin e së dielës, për të zgjedhur legjislaturën e re të vendit.

Procesi elektoral pritet të jenë një garë e fortë mes partisë Fidesz të kryeministrit në detyrë Viktor Orban dhe aleancës mes 6 partive opozitare të udhëhequra nga Peter Marki Zai.

Kryeministri Orban votoi pak orë nga hapja e qendrave të votimit, për të deklaruar menjëherë më pas se pret një fitore madhështore.

“Kam punuar shumë, ndaj pres që fitorja të jetë e madhe. Kjo është ajo çka i duhet vendit”, tha Orban.

Viktor Orban është një nga liderët më jetëgjatë të Evropës, që udhëheq vendin prej 12 vjetësh, i ndihmuar edhe nga kontrolli me dorë të hekurt i mediave shtetërore.

Sondazhet e nxjerrin partinë e tij në një avantazh të lehtë në këto zgjedhje, me 39 për qind të elektoratit kundrejt 36 për qind të opozitës.

Por duke qenë se rreth 1 e pesta e rreth 8 milionë votuesve të Hungarisë janë ende të pavendosur, zgjedhjet mund të shkojnë edhe në anën tjetër.

Qendrat zgjedhore në vend u hapën që në 6 të mëngjesit, me orën lokale dhe pritet të mbyllen në 7 të pasdites.

LEXONI GJITHASHTU:

• Hungaria në zgjedhje, partia e Orban ruan epërsinë ndaj opozitës së bashkuar
• Orban shpërfill BE-në: Do rrisim furnizimet me gaz rus