I akuzuari për sulmet e Parisit pranon se është luftëtar i ISIS

I dyshuari kryesor në sulmet xhihadiste të vitit 2015 në Paris, ku humbë jetën rreth 130 persona, deklaroi se është luftëtar të ISIS kur u paraqit të mërkurën në gjykatë.

Salah Abdeslam sfidoi gjyqtarin kryesor, ndaj të cilit ngriti dhe zërin kur bëri prezantimin.

31-vjeçari besohet të jetë i vetmi i mbijetuar i grupit të zjarrit që sulmoi 6 restorante dhe bare në Paris, sallën e koncerteve Bataclan dhe stadiumin kryesor të Francës 13 nëntorin e 6 viteve më parë.

Ai u shfaq në sallën e gjyqit i veshur me të zeza dhe me një maskë me të njëjtën ngjyrë. Kur u pyet mbi profesionin e tij, shtetasi franko-maroken hoqi maskën dhe tha: “Hoqa dorë nga puna që kisha për t’u bërë ushtar i Shtetit Islamik”. Ndërsa të pandehurit e tjerë, që akuzohen për ndihmë të agresorëve në kryerjen e sulmeve, thjesht iu përgjigjën pyetjeve rutinë dhe qëndruan të qetë.

Më vonë gjatë procesit ai i bërtiti panelit të gjyqtarëve, duke thënë se ai dhe të pandehurit e tjerë ishin trajtuar si qen gjatë qëndrimit në qeli. Nga salla, ku ndodheshin familjarët e viktimave, nuk munguan reagimet.

“Maskara, vrave 130 persona,” – tha një prej të pranishmëve.

Përgjegjësia për sulmet u mor nga Shteti Islamik, që u kishte bërë thirrje militantëve të tij që të sulmonin Francën për përfshirjen e saj në luftën kundër grupit terrorist në Irak dhe Siri.

LEXONI GJITHASHTU:

• Nis gjyqi më i madh në historinë e Francës, terroristët para drejtësisë për sulmet e vitit 2015
• Sulmet terroriste në Francë e Austri, policia dhe anti-Terrori ‘blindojnë’ njësitë diplomatike
• Planifikonin sulme terroriste sipas ideologjisë së ISIS, arrestohen 8 persona në RMV