2-fishohet kërkesa për fruta ekzotike nga Ekuadori

Tregtia me Ekuadorin u rrit me ritme të shpejta pas vitit 2015. Asokohe, vendi ynë merrte 15 mijë tonë mallra dhe 7 vjet më pas ka blerë dyfish fruta.

Arkat me banane, që mbushen në portet e Ekuadorit përshkojnë mbi 12 mijë kilometra për të ardhur në Shqipëri. Kompanitë që porositin këto ngarkesa janë zgjeruar në tregun shqiptar.

Frutat tropikale që sjell Ekuadori përbëjnë 85% të importeve, ndjekur nga prodhimet e detit, me 13%. Vitin e kaluar Shqipëria pagoi mbi 3 mld lekë për llogari të shtetit latin.

Këto janë vetëm shifrat për mallrat e deklaruara dhe të zhdoganuara me dokumente. Pjesa e drogës së kapur brenda ngarkesave me fruta ekzotike dhe asaj që potencialisht mund të ketë kaluar larg syrit të policisë, nuk llogaritet.

Në 4 vitet e fundit në Shqipëri është kapur mbi 1 tonë kokainë. 15 ngarkesa të ardhura nga Ekuadori janë bllokuar në Durrës, dhe shumë kontejnerë janë kapur që në nisje, përtej Atlantikut.