India dhe Brazili nënshkruajnë pakt minierash, Modi synon tregti prej 20 miliardë dollarësh në pesë vjet

India ndërmori hapa për të thelluar lidhjet tregtare me Brazilin të shtunën, duke nënshkruar një pakt për të zgjeruar bashkëpunimin në miniera dhe minerale. India kërkon të përmbushë kërkesën në rritje të brendshme për çelik dhe të mbështesë zgjerimin e kapaciteteve mes një gare globale për lëndë të para.

Marrëveshja u nënshkrua në prani të kryeministrit të Indisë, Narendra Modi, dhe presidentit brazilian, Luiz Inacio Lula da Silva, i cili mbërriti në New Delhi për një vizitë tre-ditore.

Modi tha se bisedimet e tyre ishin përqendruar në mënyrat për të thelluar partneritetin tregtar Indi-Brazil.

“Ne jemi të përkushtuar ta çojmë tregtinë dypalëshe përtej 20 miliardë dollarëve në pesë vitet e ardhshme”, tha Modi.

Tregtia dypalëshe midis dy vendeve aktualisht është rreth 15 miliardë dollarë.

“Kombet tona do të bashkëpunojnë ngushtë edhe në fusha të tilla si teknologjia, inovacioni, infrastruktura publike dixhitale, inteligjenca artificiale, gjysmëpërçuesit dhe më shumë”, tha Modi.

Brazili është ndër prodhuesit kryesorë në të hekurit dhe zotëron rezerva të mëdha mineralesh kritike për prodhimin e çelikut. Një bashkëpunim më i ngushtë pritet të përmirësojë aksesin e Indisë në lëndët e para dhe teknologjitë e nevojshme për të mbështetur rritjen afatgjatë në sektorin e çelikut, thuhet në një deklaratë të qeverisë indiane.

India ka një kapacitet prodhimi çeliku prej 218 milionë tonësh metrikë dhe kompanitë po zgjerojnë prodhimin për të përmbushur kërkesën vendase në rritje të nxitur nga zhvillimi i infrastrukturës dhe industrializimi.

India dhe Brazili kanë qenë partnerë strategjikë që nga viti 2006, me bashkëpunim që përfshin tregtinë, mbrojtjen, energjinë, bujqësinë, shëndetësinë, mineralet kritike, teknologjinë dhe infrastrukturën dixhitale.